viernes, 25 de abril de 2014
Preparativos da Marcha da Troita
Moi boas a tod@s,
Estes días estamos traballando arreo para ir pulindo os detalles e preparativos da “I Marcha BTT da Troita”. Como vimos dicindo dende o club, o percorrido non será demasiado esixente dende o punto de vista físico e técnico, pero a diversión está asegurada. Para o noso parecer o percorrido é, tendo en conta a paisaxe, espectacular. Antiga vía do tren cruzando por riba do Río Tambre, “single tracks” polas ribeiras do Río Lengüelle, zonas técnicas sen demasiado perigo pero divertidas, camiños de monte e corredoiras das de antes, e en tan só 41 km pasaredes por cinco concellos. En definitiva, unha ruta para gozala sen necesidade de ir as carreiras aínda que cada quen é libre de facela ao ritmo que desexe. Ademais do avituallamento da chegada, están previstos outros dous no percorrido, un, líquido e sólido na metade do mesmo, e outro líquido nun punto aínda non determinado pola organización.
A priori pode parecer, polo que contamos, que a ruta é demasiado sinxela, pero, sen embargo, para algúns ha de ser certamente dabondo. O que si podemos asegurar é que en xeral o percorrido, para os que o desexen, permitiralles rodar a bo ritmo.
Isto custa organizalo, traballo e cartos, pero facémolo con toda a ilusión do mundo para que o pasedes estupendamente. Tamén esperamos, que por ser a primeira vez, cometer fallos de principiantes e, por iso, pedimos a vosa comprensión e as desculpas se non agradamos a todos por igual prometendo mellorar nas seguintes edicións.
martes, 22 de abril de 2014
I Marcha BTT da Troita (maio 2014)
"I Marcha BTT da Troita", saída non
competitiva en grupo, organizada polo Club Ciclista Tambre Bike e o Concello de
Oroso. Ruta "Das Lobeiras", percorrido 41 km. Dificultade física de
nivel medio e técnica de nivel medio - alto. Non recomendable para menores de
16 anos.
Saída dende o pavillón polideportivo de Sigüeiro as 09:30
horas do domingo día 11 de maio. Para máis información consultar neste blog ou no facebook do tambrebike.
Percorrido aproximado da ruta, pode variar minimamente.
Perfil ruta "Das Lobeiras"
viernes, 11 de abril de 2014
lunes, 7 de abril de 2014
Información
sobre as inscricións:
Os que teñades algún tipo de problema para facer a
inscrición a través do enlace para o pagamento con tarxeta, tamén podedes optar
por facer un ingreso na conta do club, sinalando no concepto do ingreso
"inscrición Marcha da Troita" ademais do nome e os apelidos.
Recoméndase facer as inscricións co sistema de pagamento con tarxeta, por unha simple cuestión de comodidade, para a
organización, xa que automaticamente se exportan as listaxes en documentos
facilmente manexables. Grazas a todos pola vosa colaboración.
A conta do club é: 0133 7996 05
4200000653, de La Caixa
domingo, 6 de abril de 2014
Descrición da ruta
Descrición da
ruta
A "I Marcha BTT da Troita" é unha saída non
competitiva que percorre 41 km. polos
concellos de Oroso, Ordes, Tordoia e Trazo. Sen ser unha ruta das chamadas
duras, pois ten 960 m de desnivel positivo, pódese considerar un percorrido dos
nomeados rompe pernas. Terreo mixto, rápido por treitos e técnico e máis lento
noutros. Dos 41 km, o 90% transcorre por camiños e pistas, tan só uns cinco
quilómetros de asfalto que corresponden aos inevitables enlaces e a chegada ó
pobo polo Polígono Industrial de Oroso.
A saída do pobo faise pola estrada da Grabanxa ata atopar
a N-550 que tomaremos cara a Santiago e, nada máis cruzar a Ponte de Sigüeiro
sobre o Tambre, facemos unha viraxe pechada á dereita cara o lugar dos Mallos.
A través dunhas pistas imos na busca da antiga vía do tren que atoparemos a uns
tres quilómetros da saída. Por riba desta plataforma de pedra cruzamos o lugar
onde se encontran os ríos Lengüelle e Tambre, sitio fermoso onde os haxa. Saímos
da vía, momentaneamente, e entramos no Concello de Trazo pola Parroquia de
Berreo para transitar por unha braña poboada de carballos e árbores de ribeira.
Antiga vía do tren
Logo de abandonar a nomeada braña cruzamos o Lengüelle
outra vez e enganchamos a vía do tren un anaco antes de pillar un treito moi
rápido que nos leva ata o fondal da Costa de Trasmonte, dende alí afrontamos a
primeira subida seria do percorrido, uns 700 metros que rematan nun repenico
final dun 17/18%. Ao chegar arriba, e case sen folgos, iniciamos unha baixada
moi técnica polo medio dun piñeiral no que, a bo fe, que as carozas esperan a
chegada das rodas dos bikers.
Baixamos ata o río e volvemos a retomar a vía do tren
durante un anaco e facemos unha baixada dende a mesma por un desnivel duns tres
metros que ten certa complexidade técnica, xa que remata nun camiño estreito
con viraxe pechada de 90 graos á dereita. Dende aquí facemos un treito moi
rápido na busca da vella estación da Pontraga - Ordes, xa en desuso.
Baixada da vía por un balo duns tres metros
Deixamos a estación e acometemos outro treito de 600
metros de asfalto, pola estrada Ordes - Viaño Pequeno, dirección Trazo e no
lugar da Volteira collemos un camiño que nos leva polas brañas de O Poceiro
transitando entre a Igrexa de Numide e o Lengüelle. Aquí outro tramo de enlace
e
empezamos a subir ao que nós chamamos as
"Lobeiras" propiamente ditas, o lugar ten outro nome pero alí
atopamos o lobo algunha vez e así lle chamamos. Ata o alto do Abelleira (389 m)
subimos por camiños flanqueados por carballos e piñeiros ata chegar ao cha. Alí
metémonos por un "single track" estreito e percorremos unha zona de
monte abondoso ata chegar ao avituallamento intermedio situado no Monte dos
Curros.
Despois do avituallamento iniciamos unha pequena baixada
que antecede a outra máis longa para ir chegando ao Castro de Numide, un
fermoso paraxe, e dende alí ata o cruce,
outra vez, da estrada Ordes - Viaño Pequeno a altura da aldea de A Paínza.
Unha vez cruzamos,
volvemos a rodar rápido dirección Leobalde (Trazo) e, de novo,
atopámonos co Río Lengüelle que xa nos
acompañará na viaxe durante un longo treito ata o lugar de Garga, preto da
vella Estación de Trasmonte. Facemos un anaco de vía, compartido coa ida e
noutro "single track" iniciamos a subida ao Coto da Pena, derradeira
subida antes da meta, que algúns pareceralles o Everest. Baixamos o coto e xa
divisamos Vilacide de Arriba, cruzamos por un subterráneo a N-550 en Vilanova,
encaramos o Polígono Industrial de Oroso e rematamos a ruta facendo un
"single track" polo Paseo do Río Carboeiro, xa a carón das piscinas
municipais, na chegada.
Suscribirse a:
Entradas (Atom)